பாரதி யார்?

பாரதிரப்
பாடியவன் பாரதி

சொல்லிக்கொண்டிருக்கும்போதே
விளங்கிக் கொள்வதற்காய்
கிள்ளிக் கொண்டிருக்கும்போதே
கிளர்ந்தெழுவதற்காய்
பாடியவன்


காய் பாடியவன்
பாரதி
மானுடத்தைக்
கனியாக்குவற்காய்

சேர்ந்து வாழ்வதை
சொல்லித் தந்தவன்
சோர்ந்து விழுவதைக்
கிள்ளி எறிந்தவன்

பண்டிதத் தமிழை
புதுக்க விதைத்தவன்
புதுக்கவி தைத்தவன்
அவனால்
எத்தனை புதுக்கவிதைகள்
இன்று

நாட்டில் நடப்பதைச்
சொல்லிக் கொடுத்தவன்
மட்டுமல்ல
கவிஞர்களுக்கு
ஏட்டில் நடப்பதையும்
சொல்லிக் கொடுத்தவன்

விலங்கு போட்டு
வைத்திருந்த
தமிழ் கவிதையை
விளங்க வைத்து
விடுதலை
வாங்கித் தந்தவன்

ஏனெனில்
அவன் சுதந்திரப் பாட்டுக்காரன்

நாட்டுச் சுதந்திரத்திற்காய்
பாட்டுப் பாடியவன்
பாட்டுச் சுதந்திரத்திற்காய்
நாட்டைப் பாடியவன்

தன்

தலைப்பாகைக்குள்
தன்னை வைத்தவன்
தன்
தலைப் பா
கைக்குள் வைத்தவன்

எம்மோடு
சிறு வயது முதல்
ஓடி விளையாடி
காலை எழுந்தவுடன்
நல்ல
படிப்புச் சொல்லிக் கொடுத்து

சிந்து நதியின் மிசை

தமிழ் நிலவுச் சோறூட்டி
எம்மோடைக்கியமானவன்
பாரதி

எம் பேனா
பாரதிக்கு
உடைமை ஆனது

பாரதி
எம் பேனாவுக்கு
டை
மை ஆனான்

காலச் சக்கரத்திலே
அவன் கவிதை சர்க்கரை
இனிக்க மட்டுமல்ல
உறைக்கவும் செய்தது

உணர்வுகளைத் தட்டி எழுப்பி
உண்மைகளை
உரைக்கவும் செய்தது

பாரதி
நேற்று எழுதிய
கவிதையில்
இன்றும் வாழ்பவன்

நாளையும்
உயிரோடிருப்பதற்காய்
நாற்று நட்டவன்

ஏனெனில் அவன்
சொல்லேணி வைத்து
மில்லேனியக்
கவிதை பாடியவன்

பாரதியின்
கவிதை படிக்காதவன்
எழுதிக் குவித்தாலும்
பேனைப்
பிடிக்காதவன்

அதனால் தான்
பாரதி
தன்னை யாரென்று
கேட்கச் சொன்னான்

பாரதி
யார் ?
கேட்டுப்பார்

அப்போது உனக்கு
நீ யாரென்று
தெரியும்




என்.நஜ்முல் ஹுசைன்

Powered byIP2Location.com

அஷ்ரப் ஷிஹாப்தீனின் 'அவர்கள் வருகிறார்கள்' என்ற கவிதையை அவரது ப்ளாக்கில் வாசித்தபோது ஞாபகம் வந்த என் கவிதை

இக் கவிதை தினகரன் 'ஆலமுல் இஸ்லாம்' பகுதியில் 04/03/1994 அன்று வெளிவந்தது
படையெடுப்பை முறியடிப்போம்
இது
'அமல்' விளக்கேற்றி
அழகுபடுத்தும்
ரமழான் மாதம்

நாம்
நன்மை நோட்டுக்களைப்
பெற்றுக்கொள்ள
இறைவனிடம் கையேந்தும்
இன்னருள் மாதம்

என்ன அதிசயம்

இங்கே
எம்மிடம்
கையேந்திக்கொண்டு...

எங்கிருந்து வந்தார்கள்
இந்த ஏழைகள் ?
எங்கள் சில்லறைகளுக்காய்......

நாம்
இச்சை அடக்கும்
மாதத்தில்
பிச்சைக்காரர்கள்

தெருக்களத்தில்
'வியூகம்' அமைத்து
'பரணி' பாடி
அவர்கள்
'தர்ம யுத்தம்'
தொடுத்திருக்கிறார்கள்
சில்லறைத்தனமான
பணக்காரர் செயல்களால்
சில்லறைகளாய் போன
பிச்சைக்காரர்கள்

ரமழானே
அப்போராளிகள்
உனக்கெதிராய் அல்ல .....
பணத்திற்கு எதிராய்

அவர்கள் உன்னை
அசிங்கப்படுத்தவில்லை
பணக்காரர்
அசிங்கங்களை
வெளிப்படுத்துகிறார்கள்

கொடுக்க வேண்டியதை
எடுத்துக் கொண்ட
பணக்காரருக்கு எதிராக
போர்க்கொடி
தூக்கியிருக்கிறார்கள்

ஏழைச் சகோதரர்களை
ஊர்வலம் வைத்து
சந்தோசப்படும் அவர்கள்
நாளை
தலை குனிந்து செல்லப் போகும்
ஊர்வலத்தை உணராமல் ...........

ரமழானே
இந்த ஏழைகள்
படி அரிசிக்காய்
படி
ஏறி இறங்குவதை
தடுக்க நீ
வாரி வழங்குவதைச்
சொல்லித் தந்திருக்கிறாய்

கவலைப்படாதே
இந்தப்
பிச்சைக்காரர் போராட்டத்தை
முறியடிக்க
எங்கள் பணக்காரர்கள்
தயாராகிவிட்டார்கள்

சில்லறைச் 'ஷெல்'களால்
தாக்கி அல்ல
'ஸக்காத்' ஒப்பந்தத்தால்
தூக்கி

எனவே
இந்தப் பிச்சைகாரர்கள்
வரமாட்டார்கள்

எம்மை
அசிங்கப்படுத்த
போர்க்கொடி தூக்கிக்கொண்டு
இந்தப் பிச்சைகாரர்கள்
அடுத்த வருடம்  
வரவே மாட்டார்கள்

என். நஜ்முல் ஹுசைன்

நோன்பின் மாண்பு- இது கட்டுரை அல்ல ஒரு எலி கதை

இது சென்ற வருடம் நடந்தது. எங்கள் அலுவலகத்தில் எலித் தொல்லை கொஞ்சம் அதிகமாகத்தான் இருந்தது. எங்கே இருந்து வருகிறது. எதற்காக வருகிறது என்ற கண்டு பிடிக்கமுடியாது அவதிப்பட்டோம். ஆனால் சென்ற நோன்பு மாதம் வந்தபோதுதான் அதற்கான விடை கிடைத்தது.

சில பகற்பொழுதுகளில் கூட ஓடிப் பிடித்து விளையாடிய எலிகளை நோன்பு மாதத்திலே காணவே முடியவில்லை. தலையைப் பிய்த்துக்கொண்டு விடை தேடினோம்.

விடை கிடைத்தது. நோன்பு அல்லாத காலத்தில் நாம் பகல் வேளைகளில் உணவருந்திவிட்டு மிச்சம் மிகுதமிருந்த எச்சில்களை அலுவலகத்திற்குள்ளேயே
குப்பைத் தொட்டியில் போட்டோம். அதனை ருசிப் பார்க்கத்தான் அந்த எலிகள் அங்கே நடமாடியிருக்கின்றன. நோன்பு காலத்தில்தான் பகலிலே நாங்கள் எதுவுமே போடுவதில்லையே. இரவில் அலுவலகம் மூடி இருக்கும். அதனால் எங்கள் குப்பைத் தொட்டி நோன்பு காலத்தில் எப்போதுமே சுத்தமாகவே இருக்கும். இனி அங்கே எலிகளுக்கு என்ன வேலை.

இது ஒன்றை எங்களுக்கு நன்கு புலப்படுத்தியது. எப்போதும் சுத்தமாகவே வைக்கப்பட்டிருக்கும் இடங்களுக்கு எலிகள் வருவதில்லை.

இஸ்லாமிய கீதம் - நோன்பு

என்னால் எழுதப் பட்ட இந்த இஸ்லாமிய கீதம் 2010 நோன்புப் பெருநாள் தினத்தன்று பிரபல பாடகர் டோனி ஹசன், அமீர் கான் ஆகியோரால் நேத்ரா தொலைக்காட்சியில் பாடப்பட்டது. இசை: அமீர் கான்



தலையை சாய்த்து இறையை வணங்க
சொல்லித் தந்தது - ரமழான்
இதயந் தன்னை கழுவிவிட்டு
இன்று மகிழ்ந்தது


எங்கள் வயிறு நோன்பு என்ற
பாடம் கற்றது - இதயம்
அமலில் லயித்து பாவம் விட்டு
சித்தி பெற்றது


உலக மெல்லாம் ஒன்று சேர்ந்து
பசித் திருந்தது - அல்லாஹ்
கட்டளைக்கே அடி பணிந்து
இன்பம் கண்டது


உண்மை முஸ்லிம் வாழ்வு என்ன
நோன்பு சொன்னது - இதிலே
நிலைத்து நிற்கும் மாந்த ருக்கு
சொர்க்கம் தந்தது

- என். நஜ்முல் ஹுசைன்

'இஸ்லாம் எங்கள் வழி இன்பத் தமிழ் எங்கள் மொழி'

இலங்கை மண்ணின் பிரபல முஸ்லிம் பாடசாலையான கொழும்பு சாஹிரா கல்லூரி 2004 ம் ஆண்டு தமிழ் விழாவினை நடாத்தியது. அப்போது 'இஸ்லாம் எங்கள் வழி இன்பத் தமிழ் எங்கள் மொழி' என்ற தலைப்பில் விசேட கவியரங்கொன்றையும் ஏற்பாடு செய்திருந்தது. மணிப்புலவர் மருதூர் ஏ. மஜீத், டாக்டர் ஜின்னாஹ் ஷரிப்டீன், காத்திபுல் ஹக் எஸ். ஐ. நாகூர் கனி, மேமன் கவி ஆகியோருடன் நானும் கவிதை பாடினேன். கலைவாதி கலீலின் தலைமையில் நடைபெற்ற கவியரங்கில் அன்றைய தினம் என்னால் பாடப்பட்ட கவிதை.

கவிக்கோ அப்துல் ரகுமான் கவியரங்கிற்கு முன்னிலை வகித்தார் என்பது குறிப்பிடத்தக்கது.

'இஸ்லாம் எங்கள் வழி இன்பத் தமிழ் எங்கள் மொழி'

கவிக் கோலம் போட
மட்டுமல்ல
எங்கள்
கவிக் (கு) 'ஓ' போடவும்
கவிக்கோ இங்கே

அப்துல்,
ரகு-மானைத்
தேடிப் போனதுடன்
நின்று விடாமல்

ஈமானையும்
நாடி வந்ததில்
எங்களுக்கெல்லாம்
பெருமிதம்

'இஸ்லாம் எங்கள் வழி
இன்பத் தமிழ் எங்கள் மொழி'

என்ற தலைப்பு
கவிக்கோ அவர்களே

உங்களால்
தலைப் பூ
சூடிக் கொண்டுள்ளது

கோ இருப்பதனால்
மந்திரி பிரதானிகளாய்
சபையோரே
நீங்களும் அங்கே

ஆஸ்தான புலவர்களாய்
நாங்களும் இங்கே

அனைவரையும் வாழ்த்தி வரவேற்று...

அந்த
(ஹி) ராக் குகைதானே
இந்த உலகிற்கு
பகலைத் தந்தது

இந்த
சாஹிரா பிறைதானே
நம் சமுதாயத்திற்கு
பகலையும்
பல்கலையும் தந்தது

சாஹிராவே
உன்னால்தானே
முஸ்லிம்கள்
எங்களுக்கு
முதுகெலும்பு கிடைத்தது -
அறிஞர் மத்தியில்
நிற்பதற்கு

நாம் வெறும்
கல்லாய் இருந்தோம் -
கல்லா பெட்டிக்கருகில்
எம்மை
'கல்'
என்று கூட்டி வந்து
மாணிக்கக் கல்லாய்
மாற்றினாயே
சாஹிரா
ஒரு கர்ப்பிணித் தாய்

இங்கே
அறிஞர்கள்
சூல் கொண்டிருக்கிறார்கள்

பெரிதுவக்கும் பாக்கியம்
எப்போதுமே
உனக்கிருக்கிறது


தமிழ் இனி
மெல்லச் சாகும்
என்றார்கள்


சாவது என்ன
விழுவதற்கே
விடமாட்டோம்
நாமிருக்கும் வரை
தமிழ் 'விழா' (து)
என்று
மார் தட்டி
தமிழ் விழா
எடுத்திருக்கிறார்கள்

தமிழே
இங்கு வாழும்
முஸ்லிம்கள்
உனக்கு
விழா எடுக்கக்
கடமைப்பட்டிருக்கிறார்கள்

ஏனெனில்
'லா இலாஹா
இல்லல்லாஹ்'
என்று
அரபு சொன்னபோது

'வணக்கத்திற்குரிய
நாயன் யாருமில்லை
அல்லாஹ்வைத் தவிர'

என்று சொல்லித் தந்தது
தமிழே
நீயல்லவா

நீதானே எங்களுக்கு
இஸ்லாத்தைப் போதித்தாய்

நீதானே எங்களுக்கு
இஸ்லாத்தைப் போதித்த தாய் !

மக்கத்தில்
குப்ரியத் கல்
பெயர்க்கப்பட்ட
வரலாறு சொல்லி

ஈமானின் அடிக்கல்லை
எமது இதயத்தில் நட்டியது
நீயல்லவா

இதயம் நுழைந்து
நாவில் உலா வரும்
நீ
இஸ்லாத்தை
எம் செவிக்குள் நுழைத்து
இதயத்தில் நிரப்பினாய்

நீ எமக்கு
தமிழ் பால் தந்தாய்
அது
எம் உடம்பில்
இஸ்லாமிய இரத்தமாய்....

நீ பேசப்பட்டாய்
எம் மார்க்கம்
வளர்ந்தது

இஸ்லாம் ஒரு மரம்
அது வளர
நீ ஒரு
உரம்

அல்லாஹ் உன்னை
நாவுகளில் நடமாடவைத்து
கல்புகளிலே
இஸ்லாத்தை
இடம் பிடிக்க வைத்தான்

இஸ்லாம்
உலகிற்கு வழி காட்டியது
நீ அதனை
உள்ளங்களுக்கு
வழி காட்டினாய்

இன்னுயிர் தமிழே,

எங்கள் பேச்சு வழக்கிலே
சில வேளை நீ
காயப்பட்டாலும்
மறந்துவிடாதே
அது
அன்புக் காயம்


எங்கள்
வீடுகளிலும்
வீதிகளிலும் நீ
வியாபித்திருக்கிறாய்

நீ
எங்களோடு இருக்கிறாய்
நாங்கள்
உன்னோடுதான் இருக்கிறோம்

என்றாலும்,

தமிழா 'கம்'
என்று தமிழகம்
உன்னை
வெள்ளைக்காரன்
வீட்டுப்படிகளில்
நிற்கவைக்கப்பார்க்கிறது

அப்போதுதானே
உண்மையிலேயே
நீயும், நாங்களும்
காயப்பட்டுப்போகிறோம்

ஆங்கிலத்திலேயே நடக்கும்
தமிழ்
தொலைக்காட்சி நிகழ்ச்சிகளிலே
நீயும், நாங்களும்
முடமாகிப்போகிறோம்

ஆங்கிலம் நடக்கிறது
நாங்கள்
முடமாகிப்போகிறோம்

தனித் தமிழுக்காய்
போராடிய மண்ணில்
தமிழே நீ
தனித்த
தமிழாகிவிடுவாயோ ?

தமிழகமே
உன்னால்தானே
நாங்கள்
தமிழைப் பேச
கற்றுக்கொண்டோம்

நீதானே
எங்கள் காதில்
தேனை ஊற்றினாய்
இன்று நீ ஏன்
தமிழ் பேச
தடுமாறுகின்றாய் ?

ஆங்கிலம்
உன் நாவில்
முடிச்சுப் போட்டதோ -
மூன்று முடிச்சு ?

தமிழ் இனி
மெல்லச் சாகுமா
இல்லை
இப்போதுள்ள பேரப்பிள்ளைகள்
வாயில் போட்டு
மெள்ளச் சாகுமா
என்ற நடுக்கம்.........

கொள்ளத்
தேவையில்லை

சாவது என்ன
விழுவதற்கே
விடமாட்டோம்

நாமிருக்கும் வரை
தமிழ் விழா (து)

தமிழே
நாம் உன்னைப்பற்றி
பெருமை கொள்கிறோம்

ஏனெனில்
உன்னைப் பற்றித்தானே

இஸ்லாத்தின் மேல்
பற்று வைத்தோம்

அதனால்தானே
வல்லான் அல்லாஹ்
காத்திருக்கிறான்

எங்களையும்
சொர்க்கத்தில்

பற்று வைக்க !

-என். நஜ்முல் ஹுசைன்

பாராட்டு

அதிகம்
பாராட்டும்போது
கவனமாயிருங்கள்
சுனாமி கூட
அதிகம் பார் ஆட்டிய
செயல்தான்

எனது மனைவிக்கான மரபுக் கவிதை

எனது தந்தையின் பெயர் கே. கே. எம். மொஹிதீன். தாயாரின் பெயர் சித்தி சௌதா உம்மா. எனது வளர்சிக்கெல்லாம் அடித்தளம் போட்டவர் எனது அன்புத் தந்தையார்தான். ஆரம்ப நாட்களில் எனது ஆக்கங்கள் எம்.எம்.நஜ்முல் ஹுசைன் என்ற பெயரிலேயே வெளிவந்தன. மலேசிய கவியரங்கிலும் எம்.எம்.நஜ்முல் ஹுசைன் என்றுதான் குறிப்பிடப்பட்டேன்- எனது பாஸ் போர்ட்டில் உள்ளவாறு. என்றாலும் இப்போது நான் என். நஜ்முல் ஹுசைன் என்றே எனது ஆக்கங்களை படைத்து வருகிறேன். ஒவ்வொரு ஆணின் பின்னாலும் ஒரு பெண் இருக்கிறாள் என்பார்கள். அது எத்தனைப் பேர் வாழ்வினில் உண்மையோ தெரியாது. ஆனாலும் அது எனது வாழ்வில் நிதர்சனமான உண்மை. இன்றைய எனது எல்லா வெற்றிகளுக்கும் பின்னால் எனது மனைவிதான் இருக்கிறாள். அவள் கொழும்பு மாவட்ட தகவல் அதிகாரியாக கடமை புரியும் திருமதி நூருல் அயின் நஜ்முல் ஹுசைன். எனது வெற்றியின் பின்னால் இருக்கும் எனது மனைவியை எனது பெயருக்கு முன்னால் வைத்துக் கொண்டேன். அதுதான் என். நஜ்முல் ஹுசைன் என்ற எனது பெயர்.
இப்போது புதுக் கவிதைகளை எழுதி வரும் நான் ஆரம்பத்தில் மரபுக் கவிதைகளையே எழுதி வந்தேன். இங்கே இருப்பது எனது மனைவிக்காக நான் எழுதி அந்த நாளில் இலங்கையின் பிரபல பத்திரிகையான 'சிந்தாமணி'யில் 03 . 01 . 1988 ல் வெளி வந்த மரபுக் கவிதை.
Wall Photos

மலேசிய .கோலாலம்பூர் தலை நகரில் மே மாதம் 20 , 21 , 22 ம் திகதிகளில் இடம்பெற்ற இஸ்லாமிய தமிழ் இலக்கிய மாநாடு 2011 ல் கவிக்கோ அப்துல் ரகுமானின் தலைமையில

மலேசிய .கோலாலம்பூர் தலை நகரில் மே மாதம் 20 , 21 , 22 ம் திகதிகளில் இடம்பெற்ற இஸ்லாமிய தமிழ் இலக்கிய மாநாடு 2011 ல் கவிக்கோ அப்துல் ரகுமானின் தலைமையில் நடைப்பெற்ற கவியரங்கில் அண்ணல் நபிகளாரின் அழகிய பண்புகள் என்ற தலைப்பில் எளிமை என்ற உப தலைப்பில் என். நஜ்முல் ஹுசைனினால் பாடப்பட்டு ஒட்டுமொத்த சபையோரினதும் , கூடியிருந்த பேராசிரியர்கள், அறிஞர்களதும் பெரும் பாராட்டைப் பெற்ற கவிதை

பிஸ்மில்லாஹிர் ரஹ்மானிர் ரஹீம்

முடியாது
பாட முடியாது
கவிதை பாட முடியாது

..............................................

தமி ழூற்றுக்
கவிதை தர
தலை வணங்கிக்
கேட்டு நின்றேன்
உலகாளும் அல்லாஹ்வே
எனக்கே நீ
அருள் புரிவாய்

தமிழ் வந்து
எனைத் தழுவி
நடமிடட்டும்
என் சிறு வாய்

அந்த
ரஹுமான்
துணை புரிந்தான்

அப்துல்
ரகுமானின் தலைமையிலே
தமிழ் சொல்ல

நான் பெரிய
கவி அல்ல

நான் வந்ததெல்லாம்
உங்கள் கவி அள்ள

என்றாலும்
நீங்களெல்லாம்
ஒருமித்து துஆ கேளுங்களேன்
இச் சபை முன்னே
என் கவி தையும்
வெல்ல


மலேசிய மண்ணுக்கு
நன்றி சொல்வேன்

இலங்கைக்கு
ஒரு கை இருக்கிறது

நீ
இரு கை நீட்டியதற்கு

இங்கே
இருக்கை தந்ததற்கு

கோலாலம்பூரே
இன்று  நீ
கோலாகலம்பூராய்
உரு பெற்றாய்
ஏனெனில்
உன் தெருவெங்கும்
தமிழ்
கோலமல்லவா போடப்பட்டிருக்கிறது

....................................................

கவிக்கோ
தலைமைக்காய்

தலை மை
தொட்டு
கவிதை எழுதி வந்த
கவிஞர்களே ,
கற்றறிந்த அறிஞர்களே ,
என்
தாய் மண்ணின் முத்துக்களே,
இலக்கிய உறவுகளே
அனைவருக்கும் எந்தன் சலாம்

அஸ்ஸலாமு அலைக்கும்

என் தாய்நாட்டுக் கவிஞர்கள்
இனிக்கும்
வெல்லமாய் கவி பாடும்
வெள்ளம்

வெள்ளம் அங்கிருக்க
தெறித்த சிறு துளியாய்
நான்

மலேசிய மண்ணே
ஓர்
உறவுக்காரனாய்
இங்கே நிற்பதில்
பெரு மகிழ்ச்சி எனக்கு

உனக்கும்
எனக்கும் ஒரு
முன் உறவிருக்கிறது

நான் பிறந்தது
கொழும்பு பீர் சாஹிபு வீதியில்

அது
உனது பொக்கிஷமொன்றை
பீர் சாஹிபு தைக்காவில்
பாதுகாத்து வைத்திருந்தது

உங்கள் நாட்டு ஞானி
துவான் பங்கேரா
அங்கேதான் அடங்கப்பட்டிருந்தார்

அது என்ன
அடங்கப்பட்டிருந்தார் ?

ஏனெனில் அவர்
மீண்டும்
தோண்டியெடுக்கப்பட்டார்

மீண்டும்
தோண்டியெடுக்கப்பட்ட
அவரது உடலை
மலேசிய மண்ணே
நீ
ஆரத் தழுவிக்கொண்டாய்

பழுதடையாதிருந்த
அவரது உடலைப் பார்த்து
அப்போதைய பிரிட்டிஷ் ஆட்சி
அகல விரித்தது
விழிகளை மட்டுமல்ல -
செங்கம்பளத்தையும்தான்

சிறு வயதில்
என் காதில் விழுந்த
இந்த செய்தி
மலேசிய உறவுகளே
உங்களை கண்டதும்
என் மனதில்
எழுந்து நிற்கிறது

நான்
புதுக் கவி
தைக்க வந்தவன்
புதுக்க
விதைக்க வந்தவன்
புது
கவிதைக்கு வந்தவன்

அதனால்தான் சொன்னேன்

முடியாது
பாட முடியாது
கவிதை பாட முடியாது

எப்போதும்
ஆடம்பரமாகவே
வாழ ஆசைப்படும்
ஒரு சமூகத்தின்
உறுப்பினனாய்
இருக்கும் என்னால்

அண்ணலே யாராசூலே

முடியாது
பாட முடியாது
உங்கள்
எளிமையைப் பாட முடியாது

உங்கள்
எளிமையைப் பாட முடியாது
எனது நாவும்
நாணித் தவிக்கிறது

எளிமையினால்
வலிமைப் பெற்ற
வரலாற்று நாயகர் அல்லவா
நீங்கள்

கோடீஸ்வரர் பட்டியலில்
முதலிடம் பிடிக்கத் துடித்து
இன்று
ஓடி ஒளிய இடம் தேடும்
எங்கள் உலகத் தலைவர்களினால்
எங்கள் சரித்திரம்
சந்தி சிரிக்கும்
இவ் வேளை

அண்ணலே யாரசூலே
உங்கள் எளிமையைப் பாட

என்ன தகுதி எனக்கு
என்று கேட்டு
என் நாவு
நாணித் தவிக்கிறது

எத்தனை வண்ண மைகளினால்
வர்ணிக்கப்படுபவர்
நீங்கள்
என்றாலும் உங்களை நீங்கள்
எளிமையினால்தானே
எழுதிக் கொண்டீர்கள்

புகழ்
உங்கள் பண்புகளோடு
ஓட்டப் போட்டி நடத்தி
தோற்றுப் போனது

ஒப்பனை போட்ட
பண்புகளுடன்
இந்த உலகம்
வலம்  வரும்போது

இயற்கை அழகுடனல்லவா
உங்கள் பண்புகள்
ஆட்சி பீடமேறின
இதயங்களையெல்லாம்
கொள்ளை கொண்டன

அதனால்தானே
எந்த மொழி நாவானாலும்
உங்களை வாழ்த்திப் பாடுவதை
வரமாகப்
பெற்றுக் கொண்டுள்ளன

உங்களை வாழ்த்தி
தங்களுக்கு
வாழ்வு பெற்றுக் கொள்கின்றன

யாரசூலே
வல்லான் அல்லாஹ்
உங்களை
இந்த மாநிலத்துக்கே
மாநபியாக்கி
பொன்னாடை போர்த்தினான்

என்றாலும்
நீங்கள் அணிந்தது
கந்தலாடைதானே

முத்து மணி ரத்தினங்கள்
மன்னர்களின் ஆடைகளை
அலங்கரித்து கொண்டிருந்தபோது

நீங்கள் அணிந்தது
கந்தலாடைதானே

குப்பையில் சேர வேண்டிய
உங்கள் ஆடைகள்
மீண்டும் மீண்டும்
ஊசியைத்தானே
தேடின -
தம் கிழிசல்களைத் தைத்துக் கொள்ள

நாயகமே
நபித்துவம்
உங்களோடு முசாபஹா செய்ய
கற்களுக்குச் சொல்லிக் கொடுத்தது -
மக்கத்துக்
கற்களுக்குச் சொல்லிக் கொடுத்தது

அந்தக் கற்கள்
நபிகள்
கோனை அல்லவா
காயப்படுத்தினோம் என்று
வெட்கப்பட்டன-
உங்கள் இரத்தத்தால்
தங்களை போர்த்திக்கொண்டன

........................................................................

பிரியாணிக்காய்
சர்வதேசமெங்கும்
புகழ் பெற்ற
உம்மத் நாங்கள்

எங்கள் தலைவரே

சா பாடு பட்டுத்தானே
சாதாரண சாப்பாடும்
உங்களை வந்தடைந்தது

உங்கள் வயிற்றின்
உள் பசிக்கு
வயிற்றுக்கு வெளியிலல்லவா
விருந்து படைத்தீர்கள் -
கற்களால்

ஆண்டுக்கு ஒரு முறை
நாங்கள்
நோன்பு பிடிக்கிறோம்

ஆனாலும்
எந்நாளுமே நோன்புக்கு
உங்களைப் பிடித்திருந்தது

செல்வத்தின் கால்களிலே
சுஜூது செய்ய
ஆசைப்படும்
உம்மத் நாங்கள்

உங்கள் கால்களுக்கடியில்
சுஜூது செய்ய ஆசைப்பட்ட
செல்வதையல்லவா
உதைத்துத் தள்ளினீர்கள்

'வறுமையே
பிரியாதே' என்று
ஒப்பந்தம் செய்து கொண்டு
ஏழ்மையை
மணி மகுடமாய்ச் சூடிக்கொண்ட
விசித்திர
மன்னர் நீங்கள்

மந்திரத்தால்
'தங்க'
மாங்காய்ப் பறிக்கும்
ஆற்றல் பெற்றிருந்த
மாநபியே

வறுமையை அல்லவா
உங்கள்
மந்திரக்கோல் ஆக்கிக் கொண்டீர்கள்

பட்டு மெத்தை
உங்கள் மேனியை
தொட்டுப் பார்க்கத்
துடிக்கையிலே

வெறும்
ஈச்சம் பாய்க்குத்தானே
அந்தப் பாக்கியத்தைத்
தந்தீர்கள்

பாய்தானே
உங்கள் மேனியெங்கும்
வாய் வைத்தது

இரவெங்கும்
உங்கள் மேனியோடு
அதன் உரையாடல்

உங்கள்
எத்தனை நித்திரைகளைச்
சுமையாக்கியது

..........................................................

முழு நாட்டையுமே
தங்களது மாளிகையாக்க
வளைத்துப்போட
நினைக்கும்
எங்கள் ராஜாக்களுக்கு
மத்தியில்

வெறும்
திண்ணையிலே
சாம்ராஜ்யம் அமைத்த
சக்கரவர்த்தி நீங்கள்

திண்ணைத் தோழர்கள்தானே
உங்கள் மந்திரிகள்

உங்கள்
சொற்களுக்குக் கட்டுண்டவர்களை
சீடர்களாக்கி
அவர்களைக் கொண்டே
மேலாசனம் போடாமல்
தோழர்களாக்கி
சரியாசனம் போட்டீர்கள் -
தோளோடு தோள் சேர்த்தீர்கள்

நீக்ரோ இனத்தையே
முதன் முதல்
ஆரத் தழுவி
மேன்மை படுத்திய
வெள்ளை மாளிகை
நீங்கள் அல்லவா
நாயகமே

உயர்குலத்தோர்
ஆயிரம் பேர் இருக்க

ஹஸரத் பிலாலை அல்லவா
'அதான்' சிம்மாசனத்தில்
அமர்த்தி அழகு பார்த்தீர்கள்

எடுபிடிகள் வைத்து
கெடுபிடிகள் காட்டி
தங்களைத் தலைவர்களாய்
பிரகடனப்படுத்திக் கொள்ளும்
உலகத் தலைவர்களைப் பார்த்து
அடிக்கடி இந்த பூமி
அதிர்ச்சி கொள்ளும்

வானவர்களே கைகட்டிச்
சேவகம் செய்ய காத்திருந்தும்
யாருக்காகவும் காத்திருக்காமல்
உங்களது வேலையை
நீங்களே செய்த
பணிவு கண்டு
அந்த பூமி
மெய் சிலிர்த்துப் போனது

கட்டளை இட்டு
ஒதுங்கி நின்ற
தலைவர் அல்ல
நீங்கள்
கற்களைச் சுமந்து
கைகளைப் புண்ணாக்கிக் கொண்ட
பெருந்தகை

ஏசிய கிழவிக்காயும்
ஏந்திய சுமைகள்
தலைக்கனம் இல்லா
உங்கள் கணங்களை   உறுதி செய்தன

உங்கள் நெறிமுறைகளிலே
இந்த உம்மத்
தீ வைத்துக்கொண்டிருக்கும் போது கூட
நாளை மஹ்சரிலே
"யா உம்மத்தீ" என்று
உம்மத்துகளுக்காய்
பூ வைக்கப் பூண்டிருக்கும்
உங்கள்
திட சங்கற்பத்தை எண்ணி
என் உள்ளம் நடுங்குகிறது

எளிமையின் நாயகரே
யா ரசூலே
உங்கள்
பாதம் மிதித்த மண்ணை
நாங்கள் தரிசிக்கும் போது
அம் மண்ணில்
நாங்கள் நடப்பதில்லை
அம் மண்ணை
எங்கள் பாதங்கள்
மிதிப்பதில்லை
சத்தியமாய் மிதிப்பதில்லை

அவை
அப் புனித மண்ணை
முத்தமிட்டு மகிழ்கின்றன

எங்கள் பாதங்கள்
அம் மண்ணை
முத்தமிட்டு முத்தமிட்டு
மகிழ்கின்றன

இதயம் தொட்டுச் சொல்கிறேன்
அண்ணலே யாரசூலே

உங்கள் எளிமையை
மை கொண்டு எழுத முடியாது -
கண்ணீர் கொண்டு
வரைவதை தவிர-
வாய் விட்டு அழுவதை தவிர

எளிமையும்
பொறுமையும் தொட்டு
நீங்கள் எழுதியதெல்லாம்
ஒற்றுமையைத்தானே

அதுதானே இப்போது
சர்வதேச தெருக்களெங்கும்
சிந்தி கிடக்கின்றது -
எங்கள் இரத்தமாய்

அதனால்தான் சொன்னேன்

இந்தச் சுமைகளை
நெஞ்சில் ஏந்திக்கொண்டு

முடியாது
பாட முடியாது
இன்று
கவிதை பாட
முடியாது

நன்றி

வஸ்ஸலாம்

- என். நஜ்முல் ஹுசைன்
(எம்.எம்.நஜ்முல் ஹுசைன்)

கவிக்கோவின் கவிதை

“பால் நகையாள்
வெண்முத்துப் பல் நகையாள்
கண்ணகியாள் கால் நகையால்
வாய் நகைபோய்க்
கழுத்து நகை இழந்த கதை “.

அருஞ்சொற்பொருள் :
பால் நகையாள் = பால் உணர்ச்சி தோன்றுகிற மாதிரி சிரிக்காதவள்
வெண்முத்துப் பல் நகையாள் = முத்துப் போன்ற பற்களை உடையவள்
கால் நகையால் = காற் சிலம்பினால்;
வாய் நகை போய் = புன்னகை மறைந்துப்போய்
கழுத்து நகை = மாங்கல்யம் (தாலி)

கவிக்கோவின் இக் கவிதை குமுதம் சஞ்சிகையில் எழுபதுகளில் இடம்பெற்ற போது இதனை வாசித்த எனது நண்பர் தமிழ்த் தென்றல் எஸ். எம். அலி அக்பர் மாதவி இல்லாத
சிலப்பதிகரமா? இக் கவிதையில் ஒரு எழுத்தை மாற்றுவதன் மூலம் மாதவியையும் இதில் சேர்த்துக் கொள்ளலாம் என்றார். அவர் இதனை இப்படி மாற்றினர்.

“பால் நகையாள்
வெண்முத்துப் பல் நகையால்
கண்ணகியாள் கால் நகையால்
வாய் நகைபோய்க்
கழுத்து நகை இழந்த கதை “.

பால் உணர்ச்சி தோன்றுகிற மாதிரி சிரிக்கக் கூடிய வெண் முத்துப் போன்ற
பற்களை உடைய மாதவியால் கண்ணகியாள் கால் நகையை விற்கப்போய் தனது கணவனை இழந்த கதை.

- என். நஜ்முல் ஹுசைன்