தியாகப் பாடம்
வெட்கத்தில் எங்கள் பாதங்கள்
மக்கத்து மண்ணை
முத்தமிட முடியாமல்
போனதே என்று
சிறு கதவை மட்டுமே
திறந்து வைத்திருக்கும் புனித மண்
கொரோனா சிறையில் அகப்பட்ட
வெள்ளைப் புறாக்கள் -
சிறகுகள் விரிக்க முடியாமல்
உலகத் தோழர்களோடு
தோள் சேர முடியாமல்
போடப்பட்டிருக்கும் முடிச்சு
ஹஜ்ஜையே தியாகம் செய்ய வைத்துள்ள
ஹஜ்ஜுப் பெருநாள்
எங்களை பரிசோதனைக் குழாயிலிட்டு.....
ஹஜ்ஜுக்கு போகாமலே
ஹாஜியாய் முடிசூடிக் கொள்கிறோமா
என்று பார்க்கும் ஏகன்
எங்களுக்கு அருகிலேயே
எங்களை ஹாஜியாக்கும்
பாக்கியங்கள்
நாங்கள் தியாகிகளா ?
நிரூபிப்பது எங்களிடத்தில்
புரிந்து கொண்டவர்கள்
எல்லோருமே ஹாஜிகள்தான் !
- என். நஜ்முல் ஹுசைன்.
('தமிழன்' பத்திரிகையின் ஹஜ்ஜுப் பெருநாள் விசேட மலரில் பிரசுரமான கவிதை - 21/08/2021)
