கவிஞர் கலைமகன் பைரூஸ்

 

வலம்புரி கவிதா வட்டத்தின் 93 ஆவது கவியரங்கு 28/10/2023 அன்று கொழும்பு பழைய நகர மண்டபத்தில் நடைபெற்ற போது கவியரங்கைத் தலைமையேற்று நடாத்த கவிஞர் கலைமகன் பைரூஸ் அவர்களுக்கு இவ்வாறு நான் அழைப்பு விடுத்தேன்

              - என். நஜ்முல் ஹுசைன்
               தலைவர்,
               வலம்புரி கவிதா வட்டம்
              (வகவம்)

கலைமகன் பைரூஸ்



ஆழமாய் தமிழை கற்க
ஆர்வமாய் தன்னை ஈந்தான்
வேழமாய் மொழியின் உள்ளே
வேகமாய் சென்று கற்றான்
வீழுதல் இன்றி எழுந்து
விசையுடன் கற்ப தாலே
பாழ் படலின்றி இவனும்
பண்டித னாகி நின்றான்


தமிழுக்கு தன்னைத் தந்தான்
தமிழினால் பெருமை கொண்டான்
அமிழ்தமாய் தமிழைப் பருக
அழகுற எழுது கின்றான்
இமியள வேனும் தமிழை
எவருமே களங்கம் செய்தால்
உமிழ்ந்திட அவரின் முகத்தில்
என்றுமே தயங்க மாட்டான்

வித்தகன் இவனும் கணிணி
வித்தைகள் கற்ற தாலே
புத்தமே புதிதாய் இவனின்
பெயரினில் எழுத்த மைத்தான்
சித்திரம் எழுத்தின் உருக்கு
சிறப்பிவன் பெயரை வைத்தே
முத்திரைப் பதிக்கும் கவிஞன்
கலைமகன் பைரூஸ் என்பான்


இருகரம் நீட்டி இவனை
இதயத்தால் அழைத்து நின்றோம்
வருகவே எங்கள் கவிதை
அரங்கினை தலைமை யேற்க
பருகவே உந்தன் தமிழை
பைந்தமிழ் தேனாய் பொழிக
உருகியே எங்கள் கவிஞர்
உன்னையே போற்றி மகிழ

கவிஞர் கலைமகன் பைரூஸ்
கவியரங்கு தொண்ணூற்றி மூன்று
காட்டிடுமா உன் தலைமைக்கு
சான்று !

வருக
வெலிகம மதுராப்புர
கவிஞர் கலைமகன் பைரூஸ் !

  - என். நஜ்முல் ஹுசைன்