இளநெஞ்சன் முர்ஷிதீனை இவ்வாறு அழைத்தேன்

வலம்புரி கவிதா வட்டத்தின் 21வது கவியரங்கு 27-10-2015 அன்று நடைபெற்றபோது கவியரங்கை தலைமை ஏற்று நடத்துமாறு இளநெஞ்சன் முர்ஷிதீனை இவ்வாறு அழைத்தேன் - என். நஜ்முல் ஹுசைன்

மீண்டும் வகவம்
உயிர் பெறவே
தனது மூச்சைத் தந்தவனாம்

வேண்டும் வகவம்
கவிஞருக்கு
என்று
வேர்வை சிந்தி உழைத்தவனாம்

தூண்டும் கோலாய்
தானிருந்து
திறம்பட
பணியைச் செய்பவனாம்

மாண்டுப் போகக் கூடாது
முனைப்பில்
வெற்றிப் பெற்றவனாம்

அஞ்சா நெஞ்சன்
இளநெஞ்சன்
அகலப் பார்வை
பார்த்திடுவான்

ஆழம் இருக்கும்
கவி வரியில்
அகிலம் முழுதும்
பறந்திடுவான்

உலகில் அவலம் கண்டாலே
பேனா வழியால்
கொதித்தெழுவான்
துயரக் கதைகள்
சொல்லி இவன்
மேடை மீதே
கிளர்ந் தழுவான்

அவர்க்காய்
நெஞ்சை நிமிர்த்தி இவன்
கவிதை வழியால்
போர் தொடுப்பான்

போராளி இவன்
போராளி
உரிமைக்காக -
அலைகள் வீசும்
பேராழி

பிறருக்காய்
குரல் எழுப்பும்
படைப்பாளி

ஊரெல்லாம் வாழ்த்துவது
“இவன் வாழி”

எங்கள்
செயல் வீரர் செயலாளர்
இளநெஞ்சன் முர்ஷிதீன்
கவிதைகளில்
கொட்டுவது தேன்
கொட்டுவது தேள்

இளநெஞ்சன் முர்ஷிதீன்
இன்று
கவியரங்கை நடத்து
எங்கள் இதயங்களைப் பிடித்து…………