கவிஞர் கவிநேசன் நவாஸ்

 

வலம்புரி கவிதா வட்டத்தின் 83 ஆவது கவியரங்கு 06/01/2023 வெள்ளிக்கிழமை கொழும்பு பழைய நகர மண்டபத்தில் நடைபெற்ற போது கவியரங்கைத் தலைமையேற்று நடாத்த கவிஞர் கவிநேசன் நவாஸ் அவர்களுக்கு  இவ்வாறு நான் அழைப்பு விடுத்தேன் -

என். நஜ்முல் ஹுசைன், தலைவர், வலம்புரி கவிதா வட்டம் (வகவம்)


மொழியினையே தனக்கேற்ற விதத்தில் வளைக்கும்
மோகனமாய் ஆற்றலினை நிரம்ப வைத்து
வழியெங்கும் இவன் தமிழை வாழ்த்திப் பேச
வாசகர்கள் கூட்டமதை பெற்றான்; பேறான்
அழியாத தமிழினிலே கோலம் போட்டே
அற்புதமாய் வானவில்லின் கவிதை யாப்பான்
பிழிந்தேதான் எம்மனதை ஆட்சி செய்ய
பிறந்தேதான் வந்து நின்றான் கவிதை நேசன்

வலம்புரியும் வளம்பெறவே வேண்டுமென்ற
வாஞ்சையினை நெஞ்சமெல்லாம் ஏந்தி இவனும்
வலம்வருவான்; நாள் தோறும் தோளும் தருவான்
வார்த்தையினால் மட்டுமல்ல இவனும் எங்கள்
நலம்கருதி பலவேலை நன்றாய் செய்வான்
நாம் இவனை கவியரங்கத் தலைமைதன்னில் இன்றமர்த்தி
நெஞ்சமெல்லாம் மகிழ்வு கொண்டோம்

கவிநேசன் நவாஸ் இன்று கவிதைத் தலைவன்
கவிஞர்களை ஒன்றிணைத்து முன்னே செல்வான்
புவிவெல்லும் இவன் கவிதை நாளை என்றே
புள காங்கிதம் கொண்டே வாழ்த்தி அழைப்போம்

கவிஞர் கவிநேசன் நவாஸ்
83 ஆவது வகவ கவியரங்கம்
உன்னிடத்தில்
அணைத்தே நீ வைத்துக் கொள்
எம்மையெல்லாம்
உன்னிடத்தில் !

கவிநேசன் நவாஸ் !